null La consejera de Cultura valora la apuesta de su departamento por el desarrollo y la dignificación del sector en Asturias
23 de marzo de 2023

INTERVENCIÓN DE LA CONSEJERA DE CULTURA, POLÍTICA LLINGÜÍSTICA Y TURISMO

 

Comisión de Cultura, Política Llingüística y Turismo de la Junta General

 

Señoríes, quiero empezar esta comparecencia estimando al Sr. Fernández Bartolomé la oportunidá que m’ofrez pa facer un balance de les actuaciones acometíes pola mio Conseyería nel ámbitu de Cultura a lo llargo d’esta llexislatura. Honestamente pienso que foi un tiempu de tresformaciones ensin precedentes en materia cultural n’Asturies, nel qu’encaremos un programa intensu de reformes y de medría paulatina de la financiación pública destinada a la Cultura, faciendo que l’actividá de los nuestros y les nuestres creadores llegue a más persones en más conceyos.

Na mio primer comparecencia énte esta Comisión de Cultura, el 1 d’ochobre del 2019, garré’l compromisu de trabayar sofitando a creadores y industries culturales con criterios que fixeren posible la sostenibilidá del sector favoreciendo la creación d’estructures y procesos sostenibles y buscando la so profesionalización. Trabayamos con convicción nesi compromisu y, amás, fixímoslo nunes circunstancies estraordinariamente complexes, qu’ustedes conocen bien.

Una cifra atestigua l’apueste que la mio conseyería tuvo nesti tiempu pa la Cultura. Dende’l 2019 al 2023 el presupuestu del área de Cultura aumentó nun 44 %, hasta llegar a los 32,9 millones d’euros d’anguaño, lo que supón que tamos invirtiendo nel 2023 14,8 millones d’euros más a la cultura que nel 2019.

Esta medría tien la so tresllación, como ye lóxico, a tolos grandes ámbitos de la xestión cultural que realiza la mio conseyería.

Nel 2019, la Conseyería de Cultura disponía en materia cultural namás de trés llinies de subvenciones (pa la realización d’actividaes culturales per parte d’asociaciones y per parte d’empreses, y pa la producción escénica), amás de dos llinies pa museos y biblioteques. En total, estes ayudes sumaben 363.000 euros.

Comprendimos pronto la insuficiencia d’esta estructura de sofitu a la creación y a l’actividá cultural asturiana, polo qu’a lo llargo d’esta llexislatura ún de los oxetivos fundamentales del mio departamentu foi’l de tresformar estes polítiques públiques, creando llinies nueves d’ayudes y ameyorando la so financiación.

Nesti sentíu, pasemos de les cifres que-yos acabo de referir a una situación diametralmente distinta nesti añu 2023, nel qu’existen nel ámbitu cultural 9 llinies d’apoyu con una dotación conxunta de 1.575.000 euros, lo que supón una medría del 77 % al respective del principiu de la llexislatura. Lo más importante ye qu’esti apueste presupuestariu acompañóse d’un procesu de reflexón meditáu sobre la xestión cultural n'Asturies, que determinó que les llinies nueves de subvenciones dean importancia a aspectos estratéxicos de la nuestra cultura sobre los que queremos incidir.

Por exemplu, l’antigua llinia xenérica de subvenciones a empreses culturales reconvirtióse nuna convocatoria nueva qu’integra siete llinies d’actuación, dedicaes caúna d’elles a los diferentes sectores culturales d’Asturies: artes escéniques, artes visuales, música, lliteratura, cine-audiovisual y videoxuegu, amás d’una llinia tresversal d’apoyu a la formación de la nuestra xente de la cultura. Y ello, con un presupuestu de 570.000 euros, abondo superior al que nel 2019 se dedicaba al global de subvenciones en materia cultural por parte de la Conseyería.

Amás, creemos llinies de sofitu al desenvolvimientu de proyectos culturales singulares per tol territoriu, con incidencia especial nel ámbitu rural, y tamién pa la creación lliteraria y, nel ámbitu de los museos, pa la meyora de les infraestructures de los centros museísticos de titularidá municipal, inexistente nel 2019.

Esti procesu de renovación, ampliación y meyora de les llinies d’apoyu de les que dispón la Conseyería de Cultura ta complementándose, amás, nel 2022 y 2023, con convocatories específiques derivaes del Plan Européu de Recuperación y Resiliencia, que tán dexando incidir n’aspectos como’l de la programación cultural en zones non urbanes, l’aceleración de les nuestres industries creatives o la meyora de les infraestructures escéniques y musicales o de les sales de cine. En global, nestos dos años tamos destinando dos millones d’euros d’estos fondos europeos a convocatories en concurrencia competitiva nel ámbitu cultural.

Como bien saben, en 2020 nació Asturies, Cultura en Rede, concebíu como un programa de la Conseyería de Cultura en collaboración colos conceyos interesaos pa realizar una programación pel territoriu, sobre la base de catálogos específicos, que s’actualicen semestralmente, dedicaos a tolos ámbitos: artes escéniques, música, artes visuales, lliteratura, cine y cultura tradicional, que, amás, ampliáronse puntualmente por cuenta de celebraciones especiales, como’l Xacobéu 21-22 o la puesta en marcha nel 2022 del Camín de los Santuarios. L’éxitu del programa rescampla, y d’esto ye reflexu la participación nel mesmu de más de 50 conceyos o la mesma dotación presupuestaria que la mio Conseyería destina al programa. Nel 2019 al circuitu de teatru, na so modalidá de subvención a conceyos, destináronse-y 188.000 euros, mentes que nel 2023 tamos destinando al conxuntu de circuitos del programa Asturies, Cultura en Rede, 1.050.000 euros.

Y too ello fíxose de la mano de los sectores culturales, colos que se crearon calces de comunicación normalizaos, al traviés d’unes meses sectoriales de la Cultura. Nestos mesmos momentos, por exemplu, tenemos abiertu un periodu d’aportaciones d’idees y propuestes d’eses meses a les bases d’una llinia nueva de subvenciones a festivales culturales que va tar dotada nel 2023 con 250.000 euros.

Esti diálogu colos sectores culturales ye al mio xuiciu imprescindible y tien de ser permanente y basase en midíes concretes. Durante la pandemia, la cultura demostró, una vegada más, la so importancia y la so contribución al caltenimientu del ánimu y, n’última instancia, de la salú pública, gracies a les aportaciones desinteresaes de los nuestros y les nuestres creadores.

Nesos momentos tan duros del andanciu, la mio conseyería desenvolvió un programa inéditu de sofitu a la xente de la Cultura, que determinó la convocatoria ente los años 2020 y 2021 d’hasta cinco convocatories estraordinaries d’ayudes directes a los profesionales de los diferentes sectores culturales, que supunxeron movilizar más de 6 millones d’euros.

Amás del apoyu nos momentos más difíciles, tuvimos un enfotu especial n’avanzar na proyección esterior de la nuestra cultura.  Como’l programa Camín Escena Norte o «Corten», de difusión de curtios de cine ente les comunidaes del norte.

Tamién apostemos pola celebración del Xacobéu 21-22 y pola presencia d’Asturies en redes internacionales de promoción del Xacobéu, que tienen el reflexu nel fechu de que nesti mes de mayu vaigamos coordinar la celebración internacional del Día Européu del Camín de Santiago. Tamién participemos pela primer vez, con espaciu propiu, na Feria del Llibru de Fráncfort, y asistiemos a les feries sectoriales de les artes escéniques y la lliteratura celebraes nos años últimos. La nuestra música tuvo un altavoz d’escepción nel 2022 nel Festival Intercélticu de Lorient, onde la nuestra comunidá foi la nación convidada y desenvolvió un programa intensu d’actividaes.

Tampocu nun quería dexar de referime a les instituciones culturales que xestiona y que tamién foron oxetu d’atención y dedicación especial. Empezando pela nuestra pinacoteca principal, el Muséu de Belles Artes d’Asturies, vio aumentada nesti tiempu l’aportación que fiximos dende la Conseyería de Cultura al so presupuestu nun 15,7%, lo que supón 280.238 euros más de los que disponía nel 2019, destacando tamién la recuperación nel 2022 de la política d’adquisición d’obres d’arte pa la so colección permanente que s’interrumpiere diba más d’una década.

Y, por supuestu, la concreción y llogru de financiación pa la realización de la segunda y definitiva fase de la so ampliación, a la que vamos destinar 6 millones d’euros de fondos europeos y que yá ta en fase previa a llicitación d’obres. Ye una de les grandes noticies de la Cultura nestos años, y va ayudar a que’l muséu s’afiance como ún de los grandes focos culturales d’Asturies.

Tamién en Llaboral, Centru d’Arte y Creación Industrial, y nel Centru Niemeyer, llogremos meyores importantes, materializaes nel pagu de la deuda que dambes instituciones arrastraben dende cuasimente la so puesta en marcha. Apostemos tamién pola intensificación de les sos programaciones culturales y pol cambéu del sistema de xestión, integrándose dambes instituciones nel sector públicu asturianu a lo llargo d’esta llexislatura. Tamién el Muséu Barjola aumentó pasu ente pasu’l presupuestu, lo que dexó reforciar una programación de calidá, referente nel ámbitu de les artes más actuales n’Asturies.

Nel ámbitu museísticu, reforciemos la rede de museos etnográficos, que dende’l 2021 pasó a coordinar la mio conseyería, dotándola de más presupuestu pa programes conxuntos, d’investigación y de realización d’esposiciones temporales coles qu’enseñar la riqueza de los sos fondos per tol territoriu. Tamién tamos modificando la normativa básica en materia d’organización de la rede de biblioteques d’Asturies, otru ámbitu imprescindible de la xestión cultural, que va concretase nun decretu nuevu de funcionamientu, base de la futura llei del sector. Nesti ámbitu bibliotecariu nun quiero dexar de destacar la inauguración va un añu de la nueva y magnífica biblioteca de Piedrasblancas, que la so construcción financióla dafechu la Conseyería de Cultura.

Al respective de los archivos, l’Archivu Históricu d’Asturies incrementó nestos años notablemente la so programación de difusión cultural, axudicándose, amás, nel 2022 un contratu plurianual importante pa la organización y descripción de los sos fondos documentales, que garantiza que nos años vinientes van desenvolvese trabayos importantes de meyora de la conocencia y tresmisión de los fondos documentales que guarda.

Les instituciones culturales son el fundamentu d’una xestión sólida y profesional de la nuestra cultura, a lo llargo de tol territoriu. Por eso nesta llexislatura punximos les bases pa proyectos importantes que van materializase yá na que vien. Ye’l casu del centru cultural nuevu de Grau, que ta anguaño en fase de construcción por cuenta d’un conveniu de collaboración ente la Conseyería y el Conceyu, o la Casa de la Música de Candás, que va dexar crear un polu d’actividá musical con pocos equivalentes na nuestra comunidá.

Y préstame rematar aludiendo a una iniciativa ilusionante. Refiérome al proyectu Al Faro, que va convertir d’equí a poco’l faru de Tapia nuna residencia artística de referencia, nun marcu escepcional y que va dexar establecer llazos con instituciones de primer nivel pa proyectar lo meyor de la nuestra creación.

Creo qu’esti proyectu exemplifica de manera perfecta lo que quiximos, el mio equipu y yo, realizar a lo llargo de cuatro años intensos de xestión: apostar por abrir víes nueves de desenvolvimientu, de dignificación y de proyección de los nuestros sectores culturales.

Documentación

Galería de audios

Circuito Asturias Cultura en Rede
Cambio sistema subvenciones consejería
Fondos europeos para el sector cultural
Incremento presupuesto cultura en esta legislatura
Museo de Bellas Artes de Asturias